9. ಸಈದ್ ಬಿನ್ ಝೈದ್(ರ) – Saeed Ibn Zayd (RA)

ಸಈದ್ ಬಿನ್ ಝದ್(ರ)

ಸಈದ್ ಬಿನ್ ಝೈದ್ ಅಲ್-ಕುರಶೀ ಅಲ್ -ಅದವೀ

ಜನನ ಕ್ರಿ.ಶ. 600 (ಹಿಜರಿ ಪೂರ್ವ 22) – ಮರಣ ಕ್ರಿ.ಶ. 671 (ಹಿಜರಿ 51)

ವಿಶೇಷತೆಗಳು:

·         ಸ್ವರ್ಗದ ಸುವಾರ್ತೆ ಪಡೆದ ಹತ್ತು ಸಹಾಬಿಗಳಲ್ಲಿ ಒಬ್ಬರು.

·         ಪ್ರಾರಂಭದಲ್ಲೇ ಇಸ್ಲಾಮ್ ಸ್ವೀಕರಿಸಿದವರಲ್ಲಿ ಒಬ್ಬರು.

ವಂಶ:

ತಂದೆ: ಝೈದ್ ಬಿನ್ ಅಮ್ರ್ ಬಿನ್ ನುಫೈಲ್ ಬಿನ್ ಅಬ್ದುಲ್ ಉಝ್ಝ ಬಿನ್ ರಿಯಾಹ್ ಬಿನ್ ಅಬ್ದುಲ್ಲಾ ಬಿನ್ ಕುರ್ತ್ ಬಿನ್ ರಿಝಾಹ್ ಬಿನ್ ಅದೀ ಬಿನ್ ಕಅಬ್ ಬಿನ್ ಲುಅಯ್ ಬಿನ್ ಗಾಲಿಬ್ ಬಿನ್ ಫಿಹ್ರ್ ಬಿನ್ ಮಾಲಿಕ್ ಬಿನ್ ನದ್ರ್ (ಕುರೈಶ್) ಬಿನ್ ಕಿನಾನ ಬಿನ್ ಖುಝೈಮ ಬಿನ್ ಮುದ್ರಿಕ ಬಿನ್ ಇಲ್ಯಾಸ್ ಬಿನ್ ಮುದರ್ ಬಿನ್ ನಿಝಾರ್ ಬಿನ್ ಮಅದ್ ಬಿನ್ ಅದ್ನಾನ್.

ತಾಯಿ: ಫಾತಿಮ ಬಿನ್ತ್ ಬಅ್‌ಜ ಬಿನ್ ಉಮಯ್ಯ ಬಿನ್ ಖುವೈಲಿದ್‌ ಬಿನ್ ಖಾಲಿದ್ ಬಿನ್ ಮುಅಮ್ಮಿರ್ ಬಿನ್ ಹಯ್ಯಾನ್ ಬಿನ್ ಗನ್ಮ್ ಬಿನ್ ಮುಲೈಹ್.

ಸಈದ್‌(ರ) ರವರ ವಂಶಾವಳಿಯು ಒಂಬತ್ತನೇ ಪಿತಾಮಹ ಕಅಬ್‌ರಲ್ಲಿ ಪ್ರವಾದಿ(ಸ) ರೊಂದಿಗೆ ಸಂಧಿಸುತ್ತದೆ.

ಜನನ:

ಸಈದ್‌(ರ) ಮಕ್ಕಾದಲ್ಲೇ ಹುಟ್ಟಿ ಬೆಳೆದರು. ಅವರ ತಂದೆ ಇಬ್ರಾಹೀಮ್(ಅ) ರವರ ಹನೀಫಿಯ್ಯ ಧರ್ಮವನ್ನು ಅವಲಂಬಿಸಿದವರಲ್ಲಿ ಒಬ್ಬರಾಗಿದ್ದರು. ಸಈದ್‌(ರ) ರಿಗೆ ಅಬುಲ್‌ ಅಅ್‌ವರ್‌ ಎಂಬ ಉಪನಾಮವಿತ್ತು.

ಏಕದೇವವಿಶ್ವಾಸಿ ತಂದೆ:

ಸಈದ್‌(ರ) ರವರ ತಂದೆ ಝೈದ್ ಬಿನ್ ಅಮ್ರ್ ಇಬ್ರಾಹೀಮ್(ಅ) ರವರ ಧರ್ಮದಲ್ಲಿ ನೆಲೆನಿಂತವರಾಗಿದ್ದರು. ಅವರು ವಿಗ್ರಹಾರಾಧನೆ ಮಾಡುತ್ತಿರಲಿಲ್ಲ. ಮುಶ್ರಿಕರು ಬಲಿ ನೀಡಿದ ಯಾವುದೇ ಮಾಂಸವನ್ನು ಅವರು ಸೇವಿಸುತ್ತಿರಲಿಲ್ಲ. ಅವರು ಹೇಳುತ್ತಿದ್ದರು: “ಅಲ್ಲಾಹು ಅಲ್ಲದವರ ಹೆಸರಲ್ಲಿ ಕೊಯ್ದದ್ದನ್ನು ನಾನು ತಿನ್ನಲಾರೆ.” ಅವರು ಕಅಬಾಲಯದ ಗೋಡೆಗೆ ಒರಗಿ ಕುಳಿತು ಹೇಳುತ್ತಿದ್ದರು: “ಓ ಕುರೈಶರೇ ಇಂದು ನಿಮ್ಮ ಪೈಕಿ ಇಬ್ರಾಹೀಮ್(ಅ) ರವರ ಧರ್ಮದಲ್ಲಿ ನಾನಲ್ಲದೆ ಬೇರೆ ಯಾರೂ ಇಲ್ಲ.” ಮುಶ್ರಿಕರು ಹೆಣ್ಣು ಮಗುವನ್ನು ಜೀವಂತ ದಫನ ಮಾಡುವಾಗ ಅವರು ಹೇಳುತ್ತಿದ್ದರು: “ಆ ಮಗುವನ್ನು ನನಗೆ ಕೊಡಿ. ನಾನು ಸಾಕುತ್ತೇನೆ.” ಮಗು ದೊಡ್ಡವಳಾಗುವಾಗ ಅವರು ಅವಳ ತಂದೆಯ ಬಳಿಗೆ ಹೋಗಿ ಹೇಳುತ್ತಿದ್ದರು. “ನಿನಗೆ ಇಷ್ಟವಿದ್ದರೆ ನಾನು ಅವಳನ್ನು ನಿನಗೆ ಕೊಡುತ್ತೇನೆ. ಇಲ್ಲದಿದ್ದರೆ ನಾನೇ ಸಾಕುತ್ತೇನೆ.”

ಕುರೈಶರು ತಮ್ಮ ವಿಗ್ರಹಗಳಿಗೆ ಬಲಿಕೊಡುವುದನ್ನು ಕಾಣುವಾಗ ಅವರು ಹೇಳುತ್ತಿದ್ದರು: “ಕುರಿಯನ್ನು ಸೃಷ್ಟಿಸಿದ್ದು, ಅದಕ್ಕೆ ಆಕಾಶದಿಂದ ನೀರನ್ನು ಇಳಿಸಿಕೊಟ್ಟದ್ದು, ಭೂಮಿಯಲ್ಲಿ ಹುಲ್ಲನ್ನು ಬೆಳೆಸಿಕೊಟ್ಟದ್ದು ಎಲ್ಲವೂ ಅಲ್ಲಾಹು. ಆದರೂ ಅವರು ಅದನ್ನು ಅಲ್ಲಾಹೇತರರ ಹೆಸರಲ್ಲಿ ಅವರಿಗೆ ಗೌರವ ಸೂಚಿಸುವುದಕ್ಕಾಗಿ ಬಲಿಕೊಡುತ್ತಿದ್ದಾರೆ.”

ಅವರು ತಮ್ಮ ವಿಗ್ರಹಗಳನ್ನು ದೂಷಿಸುತ್ತಿದ್ದುದರಿಂದ ಮಕ್ಕಾದ ಜನರು ಅವರನ್ನು ನಾನಾ ರೀತಿಯಲ್ಲಿ ಹಿಂಸಿಸುತ್ತಿದ್ದರು. ಹೆಚ್ಚಿನ ಹಿಂಸೆಯನ್ನು ಅವರ ಸೋದರ ಸಂಬಂಧಿ ಉಮರ್(ರ) ರವರ ತಂದೆ ಖತ್ತಾಬ್ ಬಿನ್ ನೌಫಲ್‌ರಿಂದಲೇ ಅನುಭವಿಸುತ್ತಿದ್ದರು. ಹಿಂಸೆ ತಾಳಲಾರದೇ ಬೇಸತ್ತು ಅವರು ಮಕ್ಕಾ ಬಿಟ್ಟು ಸತ್ಯಧರ್ಮವನ್ನು ಅರಸುತ್ತಾ ಶಾಮ್ ಕಡೆಗೆ ಹೋದರು.

ಅಲ್ಲಿ ಅವರು ಯಹೂದ ಪಂಡಿತರನ್ನು ಭೇಟಿಯಾದರು. ಅವರು ಹೇಳಿದರು: “ಅಲ್ಲಾಹನ ಕ್ರೋಧದ ಒಂದಂಶವನ್ನು ಸ್ವೀಕರಿಸದೆ ನಿಮಗೆ ಯಹೂದಿಯಾಗಲು ಸಾಧ್ಯವಿಲ್ಲ.” ಝೈದ್ ಹೇಳಿದರು: “ನಾನು ಅತ್ಯಂತ ಭಯಪಡುವುದು ಅಲ್ಲಾಹನ ಕ್ರೋಧವನ್ನಾಗಿದೆ.” ಅವರು ಕ್ರೈಸ್ತ ಪಂಡಿತರನ್ನು ಭೇಟಿಯಾದರು. ಅವರು ಹೇಳಿದರು: “ಅಲ್ಲಾಹನ ಶಾಪದ ಒಂದಂಶವನ್ನು ಸ್ವೀಕರಿಸದೆ ನಿಮಗೆ ಕ್ರೈಸ್ತನಾಗಲು ಸಾಧ್ಯವಿಲ್ಲ.” ಝೈದ್ ಹೇಳಿದರು: “ನಾನು ಅತ್ಯಂತ ಭಯಪಡುವುದು ಅಲ್ಲಾಹನ ಶಾಪವನ್ನಾಗಿದೆ.” ಅವರಿಬ್ಬರೂ ಇಬ್ರಾಹೀಮ್(ಅ) ರವರ ಹನೀಫಿಯ್ಯ ಧರ್ಮವನ್ನು ಅವಲಂಬಿಸುವಂತೆ ಸಲಹೆ ನೀಡಿದರು. ಝೈದ್ ಪ್ರಾರ್ಥಿಸಿದರು: “ಓ ಅಲ್ಲಾಹ್! ನಾನು ಇಬ್ರಾಹೀಮ್(ಅ) ರವರ ಧರ್ಮದಲ್ಲಿದ್ದೇನೆ ಎನ್ನುವುದಕ್ಕೆ ನಿನ್ನನ್ನು ಸಾಕ್ಷಿಯನ್ನಾಗಿ ಮಾಡುತ್ತೇನೆ.”

ಝೈದ್ ಶಾಮ್‌ನಲ್ಲಿದ್ದಾಗ ಅಲ್ಲಿ ಲಖ್ಮ್ ಗೋತ್ರದವರು ಅವರ ಮೇಲೆರಗಿ ಅವರನ್ನು ಕೊಂದರು. ಇದು ಪ್ರವಾದಿ(ಸ) ರವರು ಪ್ರವಾದಿಯಾಗುವುದಕ್ಕೆ 5 ವರ್ಷ ಮುಂಚೆಯಾಗಿತ್ತು. ಝೈದ್ ಬಗ್ಗೆ ಪ್ರವಾದಿ(ಸ) ಹೇಳುತ್ತಿದ್ದರು: “ಅವರು ಪುನರುತ್ಥಾನ ದಿನ ಒಂದು ಸಮುದಾಯವಾಗಿ ಬರಲಿದ್ದಾರೆ.”

ಇಸ್ಲಾಮ್ ಸ್ವೀಕಾರ:

ಸಈದ್‌(ರ) ಚಿಕ್ಕ ಪ್ರಾಯದಲ್ಲೇ ಇಸ್ಲಾಮ್ ಸ್ವೀಕರಿಸಿದ್ದರು. ಅವರು ಇಸ್ಲಾಮ್ ಸ್ವೀಕರಿಸಿದ 13ನೇ ವ್ಯಕ್ತಿಯಾಗಿದ್ದರು. ಅಬೂಬಕ‌ರ್(ರ) ಅವರನ್ನು ಇಸ್ಲಾಮಿಗೆ ಆಮಂತ್ರಿಸಿದಾಗ ಅವರು ಇಸ್ಲಾಮ್ ಸ್ವೀಕರಿಸಿದರು. ಅವರೊಡನೆ ಅವರ ಪತ್ನಿ ಉಮರ್(ರ) ರವರ ತಂಗಿ ಫಾತಿಮ(ರ) ಕೂಡ ಇಸ್ಲಾಮ್ ಸ್ವೀಕರಿಸಿದರು. ಅವರಿಬ್ಬರೂ ಉಮರ್(ರ)ರವರ ಭಯದಿಂದ ತಮ್ಮ ಧರ್ಮ ಪರಿವರ್ತನೆಯನ್ನು ಗೋಪ್ಯವಾಗಿರಿಸಿದ್ದರು.

ಒಂದಿನ ಉಮರ್(ರ) ಖಡ್ಗ ಹಿಡಿದು ಪ್ರವಾದಿ(ಸ) ರನ್ನು ಕೊಲ್ಲಲು ಹೊರಟಿದ್ದರು. ದಾರಿ ಮಧ್ಯೆ ಅವರಿಗೆ ನುಐಮ್ ಬಿನ್ ಅಬ್ದುಲ್ಲಾ ಸಿಕ್ಕಿದರು. ಅವರು ಕೇಳಿದರು. “ತಾವು ಎಲ್ಲಿ ಹೋಗುತ್ತಿದ್ದೀರಿ?” ಉಮ‌ರ್(ರ) ಉತ್ತರಿಸಿದರು: “ಮುಹಮ್ಮದ್‌(ಸ) ರನ್ನು ಕೊಲ್ಲಲು ನುಐಮ್(ರ) ಹೇಳಿದರು: “ಆದರೆ ಅದಕ್ಕೆ ಮುಂಚೆ ನಿನ್ನ ಕುಟುಂಬವನ್ನು ಸರಿಮಾಡಬಾರದೇ? ನಿನ್ನ ಸೋದರ ಸಂಬಂಧಿ ಸಈದ್‌(ರ) ಮತ್ತು ನಿನ್ನ ತಂಗಿ ಫಾತಿಮ(ರ) ಈಗಾಗಲೇ ಇಸ್ಲಾಮ್ ಸ್ವೀಕರಿಸಿದ್ದಾರೆ.” ನುಐಮ್(ರ) ರವರ ಮಾತು ಕೇಳಿ ಉಮರ್(ರ) ರವರ ಕೋಪ ದ್ವಿಗುಣವಾಗಿಯಿತು.

ಅವರು ಕೋಪೋದ್ರಿಕ್ತರಾಗಿ ಮನೆ ಕಡೆ ಹೆಜ್ಜೆ ಹಾಕಿದರು. ಅಲ್ಲಿ ಖಬ್ಬಾಬ್ ಬಿನ್ ಅರತ್‌(ರ) ಅವರಿಬ್ಬರಿಗೆ ಕುರ್‌ಆನ್ ಕಲಿಸುತ್ತಿದ್ದರು. ಕೋಪದಿಂದ ಕುದಿಯುತ್ತಿದ್ದ ಉಮರ್(ರ) ಸಈದ್‌(ರ) ಮತ್ತು ಫಾತಿಮ(ರ) ರಿಗೆ ಚೆನ್ನಾಗಿ ಬಾರಿಸಿದರು. ಅವರ ಮುಖದಿಂದ ರಕ್ತ ಹರಿಯಿತು. ಫಾತಿಮ(ರ) ಹೇಳಿದರು: “ಉಮ‌ರ್! ನೀನು ಮಾಡುವುದನ್ನು ಮಾಡು. ನಾವು ಇಸ್ಲಾಮ್ ಸ್ವೀಕರಿಸಿದ್ದೇವೆ.” ಉಮ‌ರ್(ರ) ಕೋಪದಿಂದ ಕುರ್ಚಿಯಲ್ಲಿ ಕುಳಿತರು. ನೆಲದ ಮಧ್ಯೆ ಬಿದ್ದಿದ್ದ ಕುರ್‌ಆನ್ ಪ್ರತಿಯನ್ನು ಕಂಡರು. ಅದನ್ನು ಎತ್ತಿಕೊಳ್ಳಲು ಉಮ‌ರ್(ರ) ಮುಂದಾದಾಗ ಫಾತಿಮ(ರ) ಅಡ್ಡ ಬಂದು ಸ್ನಾನ ಮಾಡಿ ಬಂದ ನಂತರ ಅದನ್ನು ಮುಟ್ಟಿ ಎಂದರು. ಉಮರ್‌(ರ) ಸ್ನಾನ ಮಾಡಿ ಬಂದು ಅದನ್ನು ತೆಗೆದು ಓದಿದರು. ಇದರಿಂದ ಅವರ ಮನ ಪರಿವರ್ತನೆಯಾಯಿತು. ಅವರು ಅಲ್ಲಿಂದ ನೇರವಾಗಿ ಪ್ರವಾದಿ(ಸ) ರವರ ಬಳಿಗೆ ಹೋಗಿ ಇಸ್ಲಾಮ್ ಸ್ವೀಕರಿಸಿದರು. ಸಈದ್‌(ರ) ಮತ್ತು ಫಾತಿಮ(ರ) ರವರ ದೃಢನಿಶ್ಚಯವು ಉಮರ್(ರ) ರವರ ಇಸ್ಲಾಮ್ ಸ್ವೀಕಾರಕ್ಕೆ ಕಾರಣವಾಯಿತು.

ಹಿಜ್ರ:

ಸಈದ್‌(ರ) ಮದೀನಕ್ಕೆ ಮೊತ್ತ ಮೊದಲು ಹಿಜ್ರ ಮಾಡಿದವರಲ್ಲಿ ಒಬ್ಬರಾಗಿದ್ದಾರೆ. ಅವರು ಪ್ರವಾದಿ(ಸ) ರಿಗಿಂತ ಮೊದಲೇ ಹಿಜ್ರ ಮಾಡಿದ್ದರು. ಉಮರ್(ರ) ರೊಂದಿಗೆ ಬಹಿರಂಗವಾಗಿ ಹಿಜ್ರ ಮಾಡಿದ 20 ಮಂದಿಯಲ್ಲಿ ಸಈದ್‌(ರ) ಮತ್ತು ಫಾತಿಮ(ರ) ಸೇರಿದ್ದರು.

ಯುದ್ಧಗಳು:

ಸಈದ್‌(ರ) ಪ್ರವಾದಿ(ರ) ರೊಂದಿಗೆ ಎಲ್ಲಾ ಯುದ್ಧಗಳಲ್ಲೂ ಪಾಲ್ಗೊಂಡಿದ್ದರು. ಆದರೆ ಅವರಿಗೆ ಬದ್ರ್ ಯುದ್ಧದಲ್ಲಿ ಪಾಲ್ಗೊಳ್ಳುವ ಅವಕಾಶ ಸಿಕ್ಕಿರಲಿಲ್ಲ.

ಇದಕ್ಕೆ ಕಾರಣ ಪ್ರವಾದಿ(ಸ) ರವರು ಅವರನ್ನು ಮತ್ತು ತಲ್ಹ(ರ) ರನ್ನು ಮಕ್ಕಾ ಮುಶ್ರಿಕರ ವ್ಯಾಪಾರ ಸಂಘ ಶಾಮ್‌ನಿಂದ ಹಿಂದಿರುಗುವುದನ್ನು ಅರಿಯಲು ಕಳುಹಿಸಿದ್ದರು. ಅವರು ವ್ಯಾಪಾರ ಸಂಘವನ್ನು ಹುಡುಕುತ್ತಾ ಹೌರಾ ಎಂಬ ಸ್ಥಳದ ತನಕ ತಲುಪಿದರು. ವ್ಯಾಪಾರ ಸಂಘ ಅಲ್ಲಿಂದ ಹಾದು ಹೋದ ಸುದ್ದಿ ತಿಳಿದ ತಕ್ಷಣ ಅವರು ಮದೀನಕ್ಕೆ ಮರಳಿದರು. ಆದರೆ ಅವರು ಬರುವುದಕ್ಕೆ ಮೊದಲೇ ವ್ಯಾಪಾರ ಸಂಘ ಮರಳುತ್ತಿರುವ ಸುದ್ದಿ ಪ್ರವಾದಿ(ಸ) ರಿಗೆ ತಿಳಿಯಿತು. ಪ್ರವಾದಿ(ಸ) ರವರು ವ್ಯಾಪಾರ ಸಂಘವನ್ನು ಎದುರಿಸಲು ಸೇನೆ ಸಿದ್ದಗೊಳಿಸಿದರು. ಆದರೆ ಸುದ್ದಿ ತಿಳಿದ ಅಬೂ ಸುಫ್ಯಾನ್ ಮಾರ್ಗ ಬದಲಿಸಿ ಬೇರೆ ದಾರಿಯಿಂದ ಮಕ್ಕಾಕ್ಕೆ ಪಲಾಯನ ಮಾಡಿದರು. ಇತ್ತ ಕುರೈಶರು ಅಬೂಜಹಲನ ನಾಯಕತ್ವದಲ್ಲಿ ಮುಸ್ಲಿಮರ ವಿರುದ್ಧ ದಂಡೆತ್ತಿ ಬಂದನು. ಬದ್ರ್‌ನಲ್ಲಿ ಎರಡು ಸೈನ್ಯಗಳು ಮುಖಾಮುಖಿಯಾದವು.

ಮುಸ್ಲಿಮರು ಕುರೈಶರ ವಿರುದ್ಧ ಬದ್ರ್‌ನಲ್ಲಿ ಹೋರಾಡುತ್ತಿದ್ದ ದಿನ ತಲ್ಹ(ರ) ಮತ್ತು ಸಈದ್‌(ರ) ಮದೀನ ತಲುಪಿದರು. ಅವರಿಗೆ ಯುದ್ಧದ ಬಗ್ಗೆ ತಿಳಿದಿರಲಿಲ್ಲ. ಸುದ್ದಿ ತಿಳಿದ ನಂತರ ಅವರು ಮದೀನದಿಂದ ಪುನಃ ಬದ್ರ್‌ಗೆ ಹೊರಡುವಷ್ಟರಲ್ಲಿ ಯುದ್ಧ ಮುಗಿದಿತ್ತು. ಪ್ರವಾದಿ(ಸ) ರೊಂದಿಗಿನ ಮೊದಲ ಯುದ್ಧದಲ್ಲಿ ಪಾಲ್ಗೊಳ್ಳುವ ಅವಕಾಶ ಕಳೆದುಕೊಂಡಿರುವುದರಲ್ಲಿ ಅವರಿಬ್ಬರೂ ದುಃಖಿತರಾಗಿದ್ದರು. ಪ್ರವಾದಿ(ಸ) ಯುದ್ಧಾರ್ಜಿತ ಸೊತ್ತಿನಲ್ಲಿ ಅವರಿಗೂ ಪಾಲು ನೀಡಿದರು ಮತ್ತು ಅವರಿಗೆ ಯುದ್ಧದಲ್ಲಿ ಪಾಲ್ಗೊಂಡ ಪ್ರತಿಫಲವಿದೆ ಎಂದರು.

ಯರ್ಮೂಕ್ ಯುದ್ಧ:

ಪ್ರವಾದಿ(ಸ) ರವರ ಮರಣಾನಂತರ ಸಂಭವಿಸಿದ ಯರ್ಮೂಕ್ ಯುದ್ಧದಲ್ಲಿ ಸಈದ್‌(ರ) ವೀರಾವೇಶದಿಂದ ಹೋರಾಡಿದ್ದರು. ಆ ಯುದ್ಧದ ಬಗ್ಗೆ ಅವರು ಹೇಳುತ್ತಾರೆ: “ಯರ್ಮೂಕ್ ಯುದ್ಧಕ್ಕೆ ನಾವು ಸುಮಾರು 24,000 ಜನರು ಹೋಗಿದ್ದೆವು. ನಮ್ಮ ವಿರುದ್ಧ ರೋಮನ್ನರು 1,20,000 ಜನರನ್ನು ಸಜ್ಜುಗೊಳಿಸಿದರು. ಪರ್ವತ ಗಳು ಕೂಡ ನಡುಗುವ ರೀತಿಯಲ್ಲಿ ಅವರು ಭಾರೀ ಚಲನೆಯೊಂದಿಗೆ ನಮ್ಮ ಕಡೆಗೆ ಬರುತ್ತಿದ್ದರು. ಅವರ ಮುಂಭಾಗದಲ್ಲಿ ಬಿಷಪ್ಪರು ಮತ್ತು ಪಾದ್ರಿಗಳಿದ್ದರು. ಅವರು ಕೈಯಲ್ಲಿ ಶಿಲುಬೆಗಳನ್ನು ಹಿಡಿದುಕೊಂಡಿದ್ದರು. ಅವರು ಗಟ್ಟಿಯಾಗಿ ಸ್ತೋತ್ರಗಳನ್ನು ಹೇಳುತ್ತಿದ್ದರು ಮತ್ತು ಅವರ ಹಿಂದೆ ಸೈನಿಕರು ಅದನ್ನು ಪುನರಾವರ್ತಿಸುತ್ತಿದ್ದರು. ಇಂತಹ ದೊಡ್ಡ ಸೈನ್ಯವನ್ನು ಕಂಡಾಗ ಮುಸ್ಲಿಮರು ಹೌಹಾರಿದರು. ಅವರ ಎದೆಯಲ್ಲಿ ಭಯ ಮನೆಮಾಡಿತು.

ಆಗ ಅಬೂ ಉಬೈದ(ರ) ಮುಂದೆ ಬಂದು ಭಾಷಣ ಮಾಡಿ ನಮ್ಮಲ್ಲಿ ಹುರುಪು ಮತ್ತು ಉತ್ತೇಜನ ತುಂಬಿದರು. ಆಗ ಮುಸ್ಲಿಂ ಸೈನಿಕರಲ್ಲಿ ಒಬ್ಬರು ಮುಂದೆ ಬಂದು ಅಬೂ ಉಬೈದ(ರ) ರಲ್ಲಿ ಕೇಳಿದರು: “ನಾನು ಯುದ್ಧ ಮಾಡಿ ಈ ತಾಸಿನಲ್ಲೇ ಸಾಯಲು ನಿರ್ಧರಿಸಿದ್ದೇನೆ. ಅಲ್ಲಾಹನ ಪ್ರವಾದಿಗೆ ಹೇಳಲು ನಿಮ್ಮ ಬಳಿ ಏನಾದರೂ ಸಂದೇಶ ಇದೆಯೇ”? “ಹೌದು” ಅಬೂ ಉಬೈದ(ರ) ಉತ್ತರಿಸಿದರು. “ಅವರಿಗೆ ನನ್ನ ಮತ್ತು ಮುಸ್ಲಿಮರ ಕಡೆಯಿಂದ ಸಲಾಮ್ ತಿಳಿಸಿ. ಮತ್ತು ಅವರೊಂದಿಗೆ ಹೇಳಿರಿ: ಓ ಅಲ್ಲಾಹನ ಸಂದೇಶವಾಹಕರೇ! ನಮ್ಮ ರಬ್ಬ್ ನಮಗೆ ವಾಗ್ದಾನ ಮಾಡಿದ್ದನ್ನು ನಾವು ಸತ್ಯವೆಂದು ಕಂಡುಕೊಂಡಿದ್ದೇವೆ.”

ಅಬೂ ಉಬೈದ(ರ) ತಮ್ಮ ಮಾತನ್ನು ನಿಲ್ಲಿಸುವಷ್ಟರಲ್ಲಿ ಆ ವ್ಯಕ್ತಿ ಖಡ್ಗವನ್ನು ಓರೆಯಿಂದ ಹೊರ ತೆಗೆದು ಬಿರುಗಾಳಿಯಂತೆ ಶತ್ರು ಸೈನ್ಯದೊಳಗೆ ನುಗ್ಗಿದರು. ನಾನು ಕೂಡ ನೆಲದ ಮೇಲೆ ಹಾರಿ ಶತ್ರು ಸೈನ್ಯದೊಳಗೆ ನುಗ್ಗಿ ನನ್ನ ಕೈಯಲ್ಲಿರುವ ಈಟಿಯಿಂದ ನನ್ನ ಮುಂದೆ ಬಂದ ಮೊದಲ ಶತ್ರು ಸೈನಿಕನನ್ನು ಕೊಂದುಬಿಟ್ಟೆ. ನಂತರ ಶತ್ರುಗಳ ಮೇಲೆ ಹಾರಿ ವೀರವೇಶದಿಂದ ಹೋರಾಡಿದೆ. ಅಲ್ಲಾಹು ನಮ್ಮ ಎದೆಯಲ್ಲಿದ್ದ ಎಲ್ಲಾ ಭಯಗಳನ್ನೂ ನೀಗಿಸಿದ್ದನು. ಮುಸ್ಲಿಮ್ ಸೈನಿಕರು ರೋಮನ್ ಸೈನ್ಯವನ್ನು ಚೆಲ್ಲಾಪಿಲ್ಲಿಗೊಳಿಸಿದರು. ಅಲ್ಲಾಹು ಸತ್ಯವಿಶ್ವಾಸಿಗಳಿಗೆ ಗೆಲುವು ದಾಖಲಿಸುವವರೆಗೂ ನಾವು ಧೀರವಾಗಿ ಹೋರಾಡಿದೆವು.”

ಸಈದ್‌(ರ) ಡಮಾಸ್ಕಸನ್ನು ಜಯಿಸಿದ ಯುದ್ಧದಲ್ಲೂ ಮುಂಪಂಕ್ತಿಯಲ್ಲಿದ್ದರು. ಡಮಾಸ್ಕಸನ್ನು ಜಯಿಸಿದಾಗ ಅಬೂ ಉಬೈದ(ರ) ಸಈದ್‌(ರ) ರನ್ನು ರಾಜ್ಯಪಾಲರಾಗಿ ಮಾಡಿದರು. ಅವರು ಡಮಾಸ್ಕಸ್‌ನ ಮೊತ್ತಮೊದಲ ಆಡಳಿತಗಾರರಾದರು. ಆದರೆ ಅವರಿಗೆ ಅಧಿಕಾರ ಮತ್ತು ಹಣದ ವ್ಯಾಮೋಹವಿರಲಿಲ್ಲ. ನನಗೆ ಆಡಳಿತಗಾರನಾಗಲು ಇಷ್ಟವಿಲ್ಲ, ನಾನು ತಮ್ಮೊಂದಿಗೆ ಜಿಹಾದ್‌ಗೆ ಬರುತ್ತೇನೆ ಎಂದು ಅವರು ಜೋರ್ಡಾನ್‌ನಲ್ಲಿದ್ದ ಅಬೂ ಉಬೈದ(ರ) ರಿಗೆ ಪತ್ರ ಬರೆದರು. ಅವರ ಪತ್ರ ತಲುಪುತ್ತಿದ್ದಂತೆ ಅಬೂ ಉಬೈದ(ರ) ಅವರ ಮನವಿಯನ್ನು ಸ್ವೀಕರಿಸಿದರು.

ಫಿತ್ನದಿಂದ ದೂರ:

ಉಮರ್(ರ) ರವರ ಮರಣಾನಂತರ ಸಈದ್‌(ರ) ಉಸ್ಮಾನ್(ರ) ರಿಗೆ ಬೈಅತ್ ಮಾಡಿದರು. ನಂತರ ಅಲೀ(ರ) ರಿಗೆ ಬೈಅತ್ ಮಾಡಿದರು. ಇದರ ನಂತರ ಸಂಭವಿಸಿದ ಯಾವುದೇ ಫಿತ್ನಗಳಲ್ಲೂ ಅವರು ಭಾಗಿಯಾಗಲಿಲ್ಲ.

ಮದೀನ ಸಮೀಪದ ಅಕೀಕ್‌ನಲ್ಲಿ ಉಸ್ಮಾನ್‌(ರ) ನೀಡಿದ ಸ್ಥಳದಲ್ಲಿ ತಮ್ಮ ಮರಣದ ತನಕ ವಾಸಿಸಿದರು.

ಪ್ರಾರ್ಥನೆಗೆ ಉತ್ತರ:

ಮುಆವಿಯ(ರ) ರವರ ಆಡಳಿತಕಾಲದಲ್ಲಿ ಮರ್ವಾನ್ ಬಿನ್ ಹಕಮ್ ಮದೀನದ ರಾಜ್ಯಪಾಲರಾಗಿದ್ದರು. ಆಗ ಅರ್ವಾ ಬಿನ್ ಉವೈಸ್‌ ಎಂಬ ಮಹಿಳೆ ಸಈದ್‌(ರ) ರವರು ತನ್ನ ಭೂಮಿಯನ್ನು ನುಂಗಿ ನನಗೆ ಅನ್ಯಾಯ ಮಾಡಿದ್ದಾರೆ ಎಂದು ದೂರು ನೀಡಿದಳು. ಸಈದ್‌(ರ) ಆಕೆಯ ಆರೋಪವನ್ನು ನಿರಾಕರಿಸುತ್ತಾ ಹೇಳಿದರು: “ಯಾರು ಒಂದು ತುಂಡು ಭೂಮಿಯನ್ನು ಅನ್ಯಾಯವಾಗಿ ಕಬಳಿಸುತ್ತಾರೋ ಅವರಿಗೆ ಪುನರುತ್ಥಾನ ದಿನ ಏಳು ಭೂಮಿಗಳನ್ನು ಹಾರವಾಗಿ ತೊಡಿಸಲಾಗುವುದು ಎಂದು ಪ್ರವಾದಿ(ಸ) ಹೇಳುವುದನ್ನು ನಾನು ಕೇಳಿದ್ದೇನೆ.”

ಅವರು ಆ ಭೂಮಿಯನ್ನು ಆಕೆಗೆ ಕೊಟ್ಟರು. ನಂತರ ತನ್ನ ನಿರಪರಾಧಿತ್ವನ್ನು ಸಾಬೀತುಪಡಿಸುವುದಕ್ಕಾಗಿ ಪ್ರಾರ್ಥಿಸಿದರು: “ಓ ಅಲ್ಲಾಹ್! ಆಕೆ ಸುಳ್ಳು ಹೇಳುತ್ತಿದ್ದರೆ ಆಕೆಯ ಕಣ್ಣನ್ನು ಕುರುಡು ಮಾಡು ಮತ್ತು ಆಕೆಯ ಮನೆಯನ್ನೇ ಆಕೆಯ ಸಮಾಧಿಯನ್ನಾಗಿ ಮಾಡು. ನನ್ನ ಬಗ್ಗೆ ಮುಸಲ್ಮಾನರಿಗೆ ಸ್ಪಷ್ಟ ನಿದರ್ಶನವನ್ನು ತೋರಿಸು.” ಸಈದ್‌(ರ) ರವರ ಈ ಪ್ರಾರ್ಥನೆಯನ್ನು ಅಲ್ಲಾಹು ಸ್ವೀಕರಿಸಿದನು. ಆಕೆಯ ಕಣ್ಣು ಕುರುಡಾಯಿತು. ಇದರ ನಂತರ ಆಕೆ ಮನೆಯಲ್ಲಿ ಕಣ್ಣು ಕಾಣದೆ ತಡಕಾಡುತ್ತಾ ನಡೆಯುತ್ತಿದ್ದಳು ಮತ್ತು ಹೇಳುತ್ತಿದ್ದಳು: “ಸಈದ್‌(ರ) ರವರ ಪ್ರಾರ್ಥನೆ ನನಗೆ ತಾಗಿದೆ.” ಆ ಮನೆಯಲ್ಲೇ ಒಂದು ಹೊಂಡಕ್ಕೆ ಬಿದ್ದು ಆಕೆ ಮರಣವನ್ನಪ್ಪಿದಳು.

ಮರಣ:

ಹಿಜರಿ 51 ರಲ್ಲಿ ಮುಆವಿಯ(ರ) ರವರ ಆಡಳಿತಕಾಲದಲ್ಲಿ ಸಈದ್‌(ರ) ರವರು ಮದೀನದ ಬಳಿಯ ಅಕೀಕ್ ಎಂಬ ಸ್ಥಳದಲ್ಲಿ ನಿಧನರಾದರು. ಆಗ ಅವರಿಗೆ 71 ವರ್ಷ ವಯಸ್ಸಾಗಿತ್ತು. ಅವರನ್ನು ಮದೀನದಲ್ಲಿ ದಫನ ಮಾಡಲಾಯಿತು.

ಪತ್ನಿಯರು:

1. ಫಾತಿಮ ಬಿನ್ತ್ ಖತ್ತಾಬ್

2. ಹಝ್ಮ ಬಿನ್ತ್ ಕೈಸ್

3. ಉಮಾಮ ಬಿನ್ತ್ ದುಜೈಜ್

4. ಜಲೀಸ ಬಿನ್ತ್ ಸುವೈದ್

5. ಉಮ್ಮುಲ್ ಅಸ್ವದ್

6. ಉಮ್ಮು ಖಾಲಿದ್

ಮಕ್ಕಳು:

ಗಂಡು ಮಕ್ಕಳು

1. ಅಬ್ದುಲ್ಲಾ (ತಾಯಿ: ಜಲೀಸ ಬಿನ್ತ್ ಸುವೈದ್)

2. ಅಬ್ದುಲ್ಲಾ (ತಾಯಿ: ಹಝ್ಮ ಬಿನ್ತ್ ಕೈಸ್)

3. ಅಬ್ದುರ್ರಹ್ಮಾನ್ (ತಾಯಿ: ಫಾತಿಮ ಬಿನ್‌ ಖತ್ತಾಬ್)

4. ಅಬ್ದುರ್ರಹ್ಮಾನ್ (ತಾಯಿ: ಉಮಾಮ ಬಿನ್ತ್ ದುಜೈಜ್)

5. ಇಬ್ರಾಹೀಮ್ (ತಾಯಿ: ಹಝ್ಮ ಬಿನ್ತ್ ಕೈಸ್)

6. ಹಿಶಾಮ್ (ತಾಯಿ: ಜಲೀಸ ಬಿನ್ತ್ ಸುವೈದ್)

7. ಅಮ್ರ್ (ತಾಯಿ: ಉಮಾಮ ಬಿನ್ತ್ ದುಜೈಜ್)

8. ಮುಹಮ್ಮದ್ (ತಾಯಿ: ಹಝ್ಮ ಬಿನ್ತ್ ಕೈಸ್)

9. ಝೈದ್ (ತಾಯಿ: ಜಲೀಸ ಬಿನ್ತ್ ಸುವೈದ್)

ಹೆಣ್ಣು ಮಕ್ಕಳು

1. ಉಮ್ಮುಲ್ ಹಸನ್ (ತಾಯಿ: ಉಮಾಮ ಬಿನ್ತ್ ದುಜೈಜ್)

2. ಉಮ್ಮುಲ್ ಹಬೀಬ್ (ತಾಯಿ: ಹಝ್ಮ ಬಿನ್ತ್ ಕೈಸ್)

3. ಉಮ್ಮು ಝದ್ (ತಾಯಿ: ಹಝ್ಮ ಬಿನ್ತ್ ಕೈಸ್)

4. ಆತಿಕ (ತಾಯಿ: ಜಲೀಸ ಬಿನ್ತ್ ಸುವೈದ್)

5. ಉಮ್ಮು ಸಲಮ (ತಾಯಿ: ಹಝ್ಮ ಬಿನ್ತ್ ಕೈಸ್)

6. ಉಮ್ಮು ಮೂಸಾ (ತಾಯಿ: ಉಮಾಮ ಬಿನ್ತ್ ದುಜೈಜ್)

7. ಉಮ್ಮು ನುಅಮಾನ್ (ತಾಯಿ: ಉಮ್ಮು ಖಾಲಿದ್)