ಹಫ್ಸಾ ಬಿಂತ್ ಉಮರ್‌(ರ) – ಪ್ರವಾದಿ(ಸ) ರವರ ನಾಲ್ಕನೇ ಮಡದಿ

ಹಫ್ಸಾ ಬಿಂತ್ ಉಮರ್(ರ)

ಹಫ್ಸಾ ಬಿಂತ್ ಉಮರ್‌ ಅಲ್-ಅದವಿಯ್ಯ ಅಲ್ -ಕುರಶಿಯ್ಯ

ಜನನ ಕ್ರಿ.ಶ. 604 (ಹಿಜರಿ ಪೂರ್ವ 18) ಮರಣ ಕ್ರಿ.ಶ. 665 (ಹಿಜರಿ ಶಕೆ 45)

ವಿಶೇಷತೆಗಳು:

·         ಸತ್ಯವಿಶ್ವಾಸಿಗಳ ಮಾತೆ

·         ಪ್ರವಾದಿ(ಸ) ರವರ ನಾಲ್ಕನೇ ಪತ್ನಿ

·         ಎರಡನೇ ಖಲೀಫ ಉಮರ್(ರ) ರವರ ಮಗಳು

·         ಖ್ಯಾತ ಸಹಾಬಿ ಅಬ್ದುಲ್ಲಾ ಬಿನ್ ಉಮರ್(4) ರವರ ಸಹೋದರಿ

ವಂಶ:

ತಂದೆ: ಉಮರ್ ಬಿನ್ ಅಲ್-ಖತ್ತಾಬ್ ಬಿನ್ ನುಫೈಲ್ ಬಿನ್ ಅಬ್ದುಲ್ ಉಝ್ಝ ಬಿನ್ ರಿಯಾಹ್ ಬಿನ್ ಅಬ್ದುಲ್ಲಾ ಬಿನ್ ಕುರ್ತ್ ಬಿನ್ ರಿಝಾಹ್ ಬಿನ್ ಅದೀ ಬಿನ್ ಕಅಬ್ ಬಿನ್ ಲುಅಯ್ ಬಿನ್ ಗಾಲಿಬ್ ಬಿನ್ ಫಿಹ್ರ್ ಬಿನ್ ಮಾಲಿಕ್ ಬಿನ್ ನವ್ (ಕುರೈಶ್) ಬಿನ್ ಕಿನಾನ ಬಿನ್ ಖುಝಮ್ ಬಿನ್ ಮುದ್ರಿಕ ಬಿನ್ ಇಲ್ಯಾಸ್ ಬಿನ್ ಮುದ‌ರ್ ಬಿನ್ ನಿಝಾರ್ ಬಿನ್ ಮಅದ್ ಬಿನ್ ಅದ್ಮಾನ್.

ತಾಯಿ: ನಬ್ ಬಿಂತ್ ಮಝ್ಊನ್ ಬಿನ್ ಹಬೀಬ್ ಬಿನ್ ವಹ್ಬ್ ಬಿನ್ ಹುಧಾಫ ಬಿನ್ ಜುಮಹ್. ಇವರು ಕುರೈಶ್ ವಂಶದವರು ಮತ್ತು ಉಸ್ಮಾನ್ ಬಿನ್ ಮಝ್‌ಊನ್‌(ರ) ರವರ ಸಹೋದರಿ.

ಹಫ್ಸಾ(ರ) ರವರ ವಂಶಾವಳಿಯು ಒಂಬತ್ತನೇ ಪಿತಾಮಹ ಕಅಬ್‌ರಲ್ಲಿ ಪ್ರವಾದಿ(ಸ) ರೊಂದಿಗೆ ಸಂಧಿಸುತ್ತದೆ.

ಜನನ:

ಹಫ್ಸಾ(ರ) ಮಕ್ಕಾದಲ್ಲಿ ಪ್ರವಾದಿತ್ವಕ್ಕಿಂತ ಐದು ವರ್ಷ ಮುಂಚೆ ಜನಿಸಿದರು. ಅದು ಕುರೈಶರು ಕಅಬಾಲಯವನ್ನು ಪುನರ್ ನಿರ್ಮಿಸುತ್ತಿದ್ದ ವರ್ಷ, ಹಫ್ಸಾ(ರ) ಸಹಾಬಿಗಳಲ್ಲಿ ಶ್ರೇಷ್ಠರು ಮತ್ತು ಎರಡನೇ ಖಲೀಫರಾದ ಉಮರ್ ಬಿನ್ ಖತ್ತಾಬ್(ರ) ರವರ ಹಿರಿಯ ಮಗಳು. ಇವರ ತಂದೆ ಮತ್ತು ಚಿಕ್ಕಪ್ಪಂದಿರು ಮಹಾ ಶೂರರೂ ಧೈರ್ಯವಂತರೂ ಆಗಿದ್ದರು. ಇವರ ಕುಟುಂಬದ ಏಳು ಮಂದಿ ಬದ್ರ್ ಯುದ್ಧದಲ್ಲಿ ಭಾಗವಹಿಸಿದ್ದರು. ತಂದೆ ಉಮರ್ ಬಿನ್ ಖತ್ತಾಬ್, ಚಿಕ್ಕಪ್ಪ ಝೈದ್ ಬಿನ್ ಖತ್ತಾಬ್, ಗಂಡ ಖುನೈಸ್ ಬಿನ್ ಹುಧಾಪ, ಮಾವಂದಿರಾದ ಉಸ್ಮಾನ್ ಬಿನ್ ಮಝ್‌ಊನ್, ಕುದಾಮ ಬಿನ್ ಮಝ್‌ಊನ್, ಅಬ್ದಲ್ಲಾ ಬಿನ್ ಮಝ್ಊನ್ ಮತ್ತು ಇವರ ಮಗ ಸಾಇಬ್ ಬಿನ್ ಅಬ್ದುಲ್ಲಾ ಬಿನ್ ಮಝ್‌ಊನ್

ಇಸ್ಲಾಂ ಸ್ವೀಕಾರ:

ಪ್ರಬಲ ಅಭಿಪ್ರಾಯದ ಪ್ರಕಾರ ಹಫ್ಸಾ(ರ) ರವರು ಪ್ರವಾದಿತ್ವದ ಐದನೇ ವರ್ಷದಲ್ಲಿ ತಮ್ಮ ತಂದೆ ಉಮರ್(ರ) ರೊಂದಿಗೆ ಇಸ್ಲಾಂ ಸ್ವೀಕರಿಸಿದರು. ಆಗ ಅವರಿಗೆ ಹತ್ತು ವರ್ಷ ಪ್ರಾಯವಾಗಿತ್ತು.

ಮೊದಲ ವಿವಾಹ:

ಹಫ್ಸಾ(ರ) ಸಖ್ಯ ಗೋತ್ರದ ಖುನೈಸ್ ಬಿನ್ ಹುದಾಫ(ರ) ಎಂಬವರನ್ನು ವಿವಾಹವಾದರು. ಖುನೈಸ್(ರ) ಆದ್ಯಕಾಲದಲ್ಲೇ ಇಸ್ಲಾಂ ಸ್ವೀಕರಿಸಿದವರಲ್ಲಿ ಒಬ್ಬರು. ಪ್ರವಾದಿ(ಸ) ರವರು ದಾರುಲ್ ಅರ್ಕಂಗೆ ಪ್ರವೇಶಿಸುವ ಮೊದಲೇ ಇವರು ಇಸ್ಲಾಂ ಸ್ವೀಕರಿಸಿದ್ದರು. ಮಕ್ಕಾ ಮುಶ್ರಿಕರ ಹಿಂಸೆ ಅಸಹ್ಯವಾದಾಗ ಸಹಾಬಿಗಳು ಅಬಿಸೀನಿಯಾಗೆ ಹಿಜ್ರ ಹೋದರು. ಖುನೈಸ್(ರ) ಕೂಡ ಅವರೊಡನೆ ಹೊರಟರು. ನಂತರ ಪ್ರವಾದಿ(ಸ) ಮದೀನಕ್ಕೆ ಹಿಜ್ರ ಹೋಗಲು ಆದೇಶಿಸಿದಾಗ ಅವರು ಮದೀನಕ್ಕೆ ಹಿಜ್ರ ಹೋದರು. ಆಗ ಅವರ ಜೊತೆಗೆ ಪತ್ನಿ ಹಫ್ಸಾ(ರ) ಇದ್ದರು. ಇದರ ಆಧಾರದಲ್ಲಿ ಖುನೈಸ್(ರ) ಅಬಿಸೀನಿಯಾದಿಂದ ಮರಳಿದ ನಂತರ ಹಫ್ಸಾ(ರ) ರನ್ನು ವಿವಾಹವಾಗಿರಬಹುದೆಂದು ತೋರುತ್ತದೆ. ಖುನೈಸ್(ರ) ಬದ್ರ್ ಮತ್ತು ಉಹುದ್ ಯುದ್ಧಗಳಲ್ಲಿ ಪಾಲ್ಗೊಂಡಿದ್ದರು. ಉಹುದ್ ಯುದ್ಧದಲ್ಲಿ ಉಂಟಾದ ಗಾಯಗಳು ಉಲ್ಬಣಿಸಿ ಹಿ.ಶ. 3 ರಲ್ಲಿ ಅವರು ನಿಧನರಾದರು. ಬದ್ರ್ ಯುದ್ಧದ ಗಾಯಗಳಿಂದ ಅಸುನೀಗಿದರು ಎಂದು ಕೂಡ ಹೇಳಲಾಗುತ್ತದೆ. ಇವರಿಗೆ ಯಾವುದೇ ಮಕ್ಕಳಿರಲಿಲ್ಲ.

ಪ್ರವಾದಿ(ಸ) ರೊಂದಿಗೆ ವಿವಾಹ:

ಖುನೈಸ್(ರ) ರ ಮರಣದ ಬಳಿಕ ಉಮರ್(ರ) ಮಗಳನ್ನು ಉಸ್ಮಾನ್ ಬಿನ್ ಅಫ್ಫಾನ್ (ರ) ರಿಗೆ ವಿವಾಹ ಮಾಡಿಕೊಡಲು ನಿರ್ಧರಿಸಿದರು. ಆಗ ಉಸ್ಮಾನ್ (ರ) ರವರು ಪತ್ನಿ ರುಕಯ್ಯ(ರ) ರನ್ನು ಕಳಕೊಂಡು ದುಃಖದಲ್ಲಿದ್ದರು. ಉಮರ್(ರ) ವಿವಾಹ ಪ್ರಸ್ತಾಪದೊಂದಿಗೆ ಬಂದಾಗ, ಉಸ್ಮಾನ್(ರ) ತಾನು ಈಗ ವಿವಾಹವಾಗುವ ಸ್ಥಿತಿಯದಲ್ಲಿಲ್ಲ ಎನ್ನುತ್ತಾ ನಿರಾಕರಿಸಿದರು. ನಂತರ ಉಮ‌ರ್(ರ) ರವರು ಅಬೂಬಕರ್(ರ) ರವರ ಬಳಿಗೆ ಹೋಗಿ ಮಗಳನ್ನು ವಿವಾಹವಾಗುವಂತೆ ವಿನಂತಿಸಿದರು. ಆದರೆ ಅವರು ಏನೂ ಉತ್ತರ ನೀಡಲಿಲ್ಲ. ಇದರಿಂದ ಬೇಸರಗೊಂಡ ಉಮರ್(ರ) ನೇರವಾಗಿ ಪ್ರವಾದಿ(ಸ) ರವರ ಬಳಿಗೆ ಹೋಗಿ ವಿಷಯ ತಿಳಿಸಿದರು. ಪ್ರವಾದಿ(ಸ) ನಗುತ್ತಾ ಹೇಳಿದರು, ಉಮರ್! ಬೇಸರಪಡಬೇಡ, ಉಸ್ಮಾನ್(ರ) ರಿಗೆ ನಿನ್ನ ಮಗಳಿಗಿಂತಲೂ ಉತ್ತಮ ಪತ್ನಿ ಸಿಗುತ್ತಾಳೆ ಮತ್ತು ನಿನ್ನ ಮಗಳಿಗೆ ಉಸ್ಮಾನ್(ರ) ಗಿಂತಲೂ ಉತ್ತಮ ಗಂಡ ಸಿಗುತ್ತಾನೆ. ನಂತರ ಪ್ರವಾದಿ(ರ) ರವರು ತಮ್ಮ ಮಗಳು ಉಮ್ಮು ಕುಲ್ಸೂಮ್(ರ) ರನ್ನು ಉಸ್ಮಾನ್(ರ) ರಿಗೆ ವಿವಾಹ ಮಾಡಿಕೊಟ್ಟರು. ಅದರ ನಂತರ ತಾವು ಹಫ್ಸಾ(ರ) ರನ್ನು ವಿವಾಹವಾದರು. ಮಗಳಿಗೆ ಪ್ರವಾದಿಪತ್ನಿಯರಲ್ಲಿ ಮತ್ತು ಸತ್ಯವಿಶ್ವಾಸಿಗಳ ಮಾತೆಯರಲ್ಲಿ ಸ್ಥಾನ ಸಿಕ್ಕಿದ್ದನ್ನು ಕಂಡು ಉಮರ್(ರ) ರಿಗೆ ಬಹಳ ಸಂತೋಷವಾಯಿತು.

ಮಗಳನ್ನು ಪ್ರವಾದಿ(ರ) ರವರ ಮನೆಗೆ ಕಳುಹಿಸಿ ಕೊಡುವಾಗ ಯಾವುದೇ ಕಾರಣಕ್ಕೂ ಪ್ರವಾದಿ(ರ) ರವರ ಮನಸ್ಸಿಗೆ ನೋವಾಗುವಂತೆ ನಡೆದುಕೊಳ್ಳಬಾರದು ಎಂದು ಉಮರ್(ಸ) ರವರು ಮಗಳಿಗೆ ಉಪದೇಶ ನೀಡಿದರು.

ಸೂರತು ತ್ತಹ್ರೀಮ್:

ಸೂರ ತಹ್ರೀಮ್‌ನ ಮೊದಲ ನಾಲ್ಕು ಆಯತ್‌ಗಳು ಹಫ್ಸಾ(ರ) ರವರ ಬಗ್ಗೆ ಅವತೀರ್ಣವಾಯಿತು. ಇದಕ್ಕೆ ಕಾರಣವೇನೆಂದರೆ ಪ್ರವಾದಿ(ಸ) ರವರು ಹೇಳಿದ ಒಂದು ಗುಟ್ಟನ್ನು ಹಫ್ಸಾ(ರ) ರಟ್ಟು ಮಾಡಿದ್ದರು. ಈ ಗುಟ್ಟು ಏನೆಂಬ ಬಗ್ಗೆ ವ್ಯಾಖ್ಯಾನಕಾರರ ನಡುವೆ ಭಿನ್ನಮತವಿದ್ದರೂ ಪ್ರಬಲ ಅಭಿಪ್ರಾಯದ ಪ್ರಕಾರ ಅದು ಜೇನುತುಪ್ಪ ಸೇವಿಸಿದ್ದಕ್ಕೆ ಸಂಬಂಧಿಸಿದ ಘಟನೆಯಾಗಿದೆ. ಪ್ರವಾದಿ(ರ) ರವರ ಪತ್ನಿಯರಲ್ಲಿ ಎರಡು ಗುಂಪುಗಳಿದ್ದವು. ಒಂದು ಗುಂಪಿನಲ್ಲಿ ಆಯಿಶ(ರ), ಹಫ್ಸಾ(ರ) ಸೌದ(ರ) ಇದ್ದರೆ ಉಳಿದವರು ಇನ್ನೊಂದು ಗುಂಪಿನಲ್ಲಿದ್ದರು. ಒಮ್ಮೆ ಪ್ರವಾದಿ(ಸ) ರವರು ಆಯಿಶಾ, ಹಫ್ಸಾ ಮುಂತಾದವರ ಬಳಿಗೆ ಬರುವಾಗ ತಡವಾಗುತ್ತಿತ್ತು. ಇದು ಕೆಲವು ದಿನ ಮುಂದುವರಿದಾಗ ಇದಕ್ಕೆ ಕಾರಣ ಝೈನಬ್ ಬಿಂತ್ ಜಹ್ಶ್(ರ) ಎಂದು ಆಯಿಶ(ರ)ರಿಗೆ ತಿಳಿಯಿತು. ಝೈನಬ್ ತವರು ಮನೆಯಿಂದ ಜೇನುತುಪ್ಪ ತಂದಿದ್ದರು ಮತ್ತು ಪ್ರವಾದಿ(ಸ) ರಿಗೆ ದಿನಾಲೂ ಅದನ್ನು ಕುಡಿಯಲು ಕೊಡುತ್ತಿದ್ದರು. ಇದರಿಂದಾಗಿ ಪ್ರವಾದಿ(ರ) ಇತರ ಪತ್ನಿಯರ ಬಳಿಗೆ ಬರುವಾಗ ತಡವಾಗುತ್ತಿತ್ತು. ಪ್ರವಾದಿ(ರ) ರವರು ಝೈನಬ್(ರ)ರವರ ಮನೆಯಲ್ಲಿ ಹೆಚ್ಚು ಹೊತ್ತು ತಂಗುವುದು ಆಯಿಶ(ರ) ಮತ್ತು ಹಫ್ಸಾ(ರ) ರಿಗೆ ಹಿಡಿಸಲಿಲ್ಲ. ಆಯಿಶ(ರ) ಒಂದು ಉಪಾಯ ಮಾಡಿದರು. ಪ್ರವಾದಿ(ರ) ರವರು ಝೈನಬ್(ರ)ರ ಬಳಿಯಿಂದ ನನ್ನ ಬಳಿಗೆ ಬರುವಾಗ ನಿಮ್ಮ ಬಾಯಿಂದ ಏನೋ ವಾಸನೆ ಬರುತ್ತಿದೆ ಎಂದು ಹೇಳುತ್ತೇನೆ, ನೀವು ಕೂಡ ಹಾಗೆಯೇ ಹೇಳಿರಿ ಎಂದು ಹಫ್ಸಾ ಮತ್ತು ಸೌದರಿಗೆ ಹೇಳಿದರು. ಮೂವರ ಮನೆಯಲ್ಲೂ ಒಂದು ರೀತಿಯ ಅಪವಾದ ಕೇಳಿಬಂದಾಗ ಇನ್ನು ಮುಂದೆ ನಾನು ಜೇನುತುಪ್ಪ ಕುಡಿಯುವುದಿಲ್ಲ ಎಂದು ಪ್ರವಾದಿ(ರ) ಪ್ರತಿಜ್ಞೆ ಮಾಡಿದರು. ಇದೇ ಸಮಯದಲ್ಲಿ ಪ್ರವಾದಿ(ಸ) ರವರು ಹಫ್ಸಾ(ರ) ರಿಗೆ ಒಂದು ಗುಟ್ಟು ಹೇಳಿದ್ದರು. ಅದನ್ನು ಯಾರಿಗೂ ತಿಳಿಸಬಾರದು ಎಂದಿದ್ದರು. ಆದರೆ ಹಫ್ಸಾ(ರ) ಅದನ್ನು ಆಯಿಶ(ರ) ರಿಗೆ ತಿಳಿಸಿದ್ದರು. ಇದು ಪ್ರವಾದಿ(ಸ)ರವರ ಸಿಟ್ಟಿಗೆ ಕಾರಣವಾಗಿತ್ತು.

ಇನ್ನೊಂದು ವರದಿಯ ಪ್ರಕಾರ ಸೂರ ತಹ್ರೀಮ್‌ನ ಆಯತ್‌ಗಳು ಅವತೀರ್ಣವಾಗಲು ಕಾರಣ ಒಮ್ಮೆ ಹಫ್ಸಾ(ರ) ರವರು ತವರು ಮನೆಗೆ ಹೋಗಲು ಪ್ರವಾದಿ(ರ) ರೊಂದಿಗೆ ಅನುಮತಿ ಕೇಳಿದರು. ಪ್ರವಾದಿ(ಸ) ರವರು ಅನುಮತಿ ಕೊಟ್ಟರು. ಹಫ್ಸಾ(ರ) ಹೊರಟುಹೋದ ಮೇಲೆ ಪ್ರವಾದಿರವರು ಹಫ್ಸಾ(ರ) ರವರ ಮನೆಯಲ್ಲಿ ತಮ್ಮ ಪತ್ನಿ ಮಾರಿಯಾ(ರ) ರನ್ನು ವಾಸ ಮಾಡಿಸಿದರು. ಈ ವಿಷಯ ಹಫ್ಸಾ(ರ) ರಿಗೆ ತಿಳಿದಾಗ ಅವರು ಕೋಪದಿಂದ ಪ್ರವಾದಿ(ಸ) ರನ್ನು ತರಾಟೆಗೆ ತೆಗೆದುಕೊಂಡರು. ಪ್ರವಾದಿ(ಸ) ರವರು ಪತ್ನಿಯನ್ನು ಸಂತೋಷಪಡಿಸಲು ತಾನು ಇನ್ನು ಮುಂದೆ ಮಾರಿಯಾಳ ಜೊತೆಗೆ ಸಂಪರ್ಕ ಮಾಡುವುದಿ ಲ್ಲವೆಂದು ಪ್ರತಿಜ್ಞೆ ಮಾಡಿದರು. ಈ ವಿಷಯವನ್ನು ಯಾರೊಂದಿಗೂ ಹೇಳಬಾರದೆಂದು ವಿನಂತಿಸಿದ್ದರು. ಆದರೆ ಹಸ್ಸಾ(ರ) ಈ ವಿಷಯವನ್ನು ಆಯಿಶ(ರ) ರಿಗೆ ತಿಳಿಸಿದರು. ಇದು ಪ್ರವಾದಿ(ಸ) ರವರ ಸಿಟ್ಟಿಗೆ ಕಾರಣವಾಯಿತು.

ಹಫ್ಸಾ(ರ) ಮತ್ತು ತಲಾಕ್:

ಹಫ್ಸಾ(ರ) ರವರ ಬಗ್ಗೆ ಕೋಪಗೊಂಡ ಪ್ರವಾದಿ(ಸ) ರವರು ಅವರನ್ನು ವಿಚ್ಛೇದನ ಮಾಡಲು ನಿರ್ಧರಿಸಿದರು. ಆದರೆ ಜಿಬೀಲ್‌(ಅ) ರವರು ಬಂದು, ಹಫ್ಸಾ(ರ) ರನ್ನು ವಿಚ್ಛೇದನ ಮಾಡಬೇಡಿ, ಅವಳು ಅತಿಹೆಚ್ಚು ಉಪವಾಸ ಆಚರಿಸುವವಳು ಮತ್ತು ಅತಿಹೆಚ್ಚು ರಾತ್ರಿ ನಮಾಝ್ ನಿರ್ವಹಿಸು ವವಳು. ಅವಳು ಸ್ವರ್ಗದಲ್ಲೂ ತಮಗೆ ಪತ್ನಿಯಾಗಿಯೇ ಇರುತ್ತಾಳೆ ಎಂದರು. ನಂತರ ಪ್ರವಾದಿ(ಸ) ರವರು ತಮ್ಮ ಮನಸ್ಸು ಬದಲಾಯಿಸಿದರು.

ಕುರ್‌ಆನ್ ಪ್ರತಿ:

ಪ್ರವಾದಿ(ಸ) ರವರ ಮರಣಾನಂತರ ಅಬೂಬಕರ್‌(ರ) ರವರು ಉಮರ್(ರ) ಮತ್ತಿತರ ಸಹಾಬಾಗಳೊಂದಿಗೆ ಸಮಾಲೋಚನೆ ಮಾಡಿ ಕುರ್‌ಆನನ್ನು ಕ್ರೋಢೀಕರಿಸಲು ನಿರ್ಧರಿಸಿದರು. ಈ ಕಾರ್ಯವನ್ನು ಝೈದ್ ಬಿನ್ ಸಾಬಿತ್(ರ) ರಿಗೆ ವಹಿಸಿಕೊಡಲಾಯಿತು. ಅಬೂಬಕರ್(ರ) ರವರು ನಿಧನರಾಗುವ ತನಕ ಕ್ರೋಢೀಕರಿಸಲಾದ ಆ ಪ್ರತಿ ಅವರ ಬಳಿಯಲ್ಲಿತ್ತು. ಅನಂತರ ಅದು ಉಮರ್(ಅ) ರವರ ವಶಕ್ಕೆ ಬಂತು. ಉಮರ್(ರ) ರವರು ನಿಧನರಾದಾಗ ಅದು ಹಫ್ಸಾ(ರ) ರವರ ವಶವಾಯಿತು. ನಂತರ ಉಸ್ಮಾನ್(ರ) ರವರ ಕಾಲದಲ್ಲಿ ಇಸ್ಲಾಮಿ ಸಾಮ್ರಾಜ್ಯವು ವಿಸ್ತರಿಸಿ ಜನರು ವಿಭಿನ್ನ ರೀತಿಯಲ್ಲಿ ಕುರ್‌ಆನ್ ಪಠಿಸತೊಡಗಿದಾಗ ಕುರ್‌ಆನ್ ಪಠಣದ ಸರಿಯಾದ ರೀತಿಯನ್ನು ಕಲಿಸಿಕೊಡಲು ಉಸ್ಮಾನ್(ರ) ರವರು ಹಫ್ಸಾ(ರ) ರಿಂದ ಆ ಪ್ರತಿಯನ್ನು ಪಡೆದುಕೊಂಡು ಅದರ ಪ್ರತಿಗಳನ್ನು ಎಲ್ಲಾ ಪಟ್ಟಣಗಳಿಗೆ ಕಳುಹಿಸಿಕೊಟ್ಟರು.

ವೈಶಿಷ್ಟ್ಯಗಳು:

ಹಫ್ಸಾ(ರ) ಆ ಕಾಲದಲ್ಲಿ ಓದು-ಬರಹ ತಿಳಿದಿದ್ದ ಕೆಲವೇ ಮಹಿಳೆಯರಲ್ಲಿ ಒಬ್ಬರಾಗಿದ್ದರು. ಆಯಿಶ(ರ) ಮತ್ತು ಹಫ್ಸಾ(ರ) ಸವತಿಯರಾಗಿದ್ದರೂ ಬಹಳ ಆತ್ಮೀಯರಾಗಿದ್ದರು. ಆಯಿಶ(ರ) ಹೇಳುತ್ತಿದ್ದರು, ನಾನು ಹಫ್ಸಾಳಂತಹ ಮಹಿಳೆಯನ್ನು ಕಂಡೇ ಇಲ್ಲ. ಅವಳು ಅವಳ ತಂದೆಯ ಮಗಳೇ ಆಗಿದ್ದಾಳೆ. ಹಫ್ಸಾ(ರ) ಅತಿಯಾಗಿ ಉಪವಾಸ ಆಚರಿಸುತ್ತಿದ್ದರು ಮತ್ತು ರಾತ್ರಿಯೆಲ್ಲಾ ನಮಾಝಿನಲ್ಲಿ ನಿರತರಾಗುತ್ತಿದ್ದರು. ದಾನ ಮಾಡುವುದರಲ್ಲೂ ಅವರ ಸದಾ ಮುಂಚೂಣಿಯಲ್ಲಿದ್ದರು. ಪ್ರವಾದಿ(ಸ) ರವರ ಪತ್ನಿಯರಲ್ಲಿ ನನಗೆ ಸಾಟಿಯಾಗಿ ನಿಲ್ಲುವವರು ಹಫ್ಸಾ(ರ) ಮಾತ್ರವೆಂದು ಆಯಿಶ(ರ) ಹೇಳುತ್ತಿದ್ದರು.

ಪ್ರವಾದಿ(ಸ) ರವರ ಮರಣಾನಂತರ:

ಹಫ್ಸಾ(ರ) ರವರು ಪ್ರವಾದಿ(ರ) ರೊಂದಿಗೆ ವಿದಾಯದ ಹಜ್ಜ್‌ನಲ್ಲಿ ಪಾಲ್ಗೊಂಡಿದ್ದರು. ಪ್ರವಾದಿ(ಸ) ರವರ ಮರಣಾನಂತರ ಅವರು ತಮ್ಮ ಮನೆಯಿಂದ ಕದಲಲಿಲ್ಲ. ಉಸ್ಮಾನ್(ರ) ರವರ ಕೊಲೆಯಾದಾಗ ಮುಸಲ್ಮಾನರ ನಡುವೆ ಫಿತ್ನ ಉಂಟಾಯಿತು. ಆಯಿಶ(ರ) ಬಸ್ರಕ್ಕೆ ಹೋಗಲು ನಿರ್ಧರಿಸಿದಾಗ, ಹಫ್ಸಾ(ರ) ಕೂಡ ಅವರ ಜೊತೆ ಹೊರಡುವುದರಲ್ಲಿದ್ದರು. ಆದರೆ ಅವರ ಸಹೋದರ ಅಬ್ದುಲ್ಲಾ ಬಿನ್ ಉಮರ್(ರ) ಅವರನ್ನು ತಡೆದರು.

ಹದೀಸ್ ವರದಿ:

ಹಫ್ಸಾ(ರ) ಅನೇಕ ಹದೀಸ್‌ಗಳನ್ನು ವರದಿ ಮಾಡಿದ್ದಾರೆ. ಅವರಿಂದ ವರದಿಯಾದ ಮೂರು ಹದೀಸ್‌ಗಳು ಬುಖಾರಿ ಮತ್ತು ಮುಸ್ಲಿಂನಲ್ಲಿದೆ.

ಮರಣ:

ಹಿಜರಿ ಶಕೆ 45, ಜುಮಾದಾ ಊಲಾ ತಿಂಗಳಲ್ಲಿ ತಮ್ಮ 63ನೇ ವಯಸ್ಸಿನಲ್ಲಿ ಹಫ್ಸಾ(ರ) ಇಹಲೋಕಕ್ಕೆ ವಿದಾಯಕೋರಿದರು. ಆಗ ಮುಆವಿಯ(ರ) ಖಲೀಫರಾಗಿದ್ದರು. ಅವರನ್ನು ಮದೀನದ ಬಕೀಅ್ ಕಬರಸ್ತಾನದಲ್ಲಿ ದಫನ ಮಾಡಲಾಯಿತು.